Actividades de Rotting Pizza entre febreiro e marzo de 2024

 Estas últimos meses a Asociación Lúdica de Pontevedra Rotting Pizza levou a cabo unha chea de actividades na comarca de Pontevedra. Dende actividades de xogos de mesa a obradoiros de teatro e rol, sen deixar de lado o noso amor pola pintura de miniaturas.

Estivemos dous días en Marín nos que ofreciamos aos veciños a posibilidade de pasar unha boa tarde de xogos de mesa no Museo Manuel Torres. Tivemos dende xogos de carreiras a trabalinguas, para grandes e pequenos. Fermoso o espazo no que xogamos rodeados dalgunhas das obras pictóricas do artista que da nome ao Museo 🎨

Coma o ano pasado, tamén puidemos levar a cabo o noso obradoiro de pintura de miniaturas dentro das actividades de Noites Abertas. Un nutrido grupo de persoas con ganas de coñecer os fundamentos desta disciplina tan particular na que afondamos no uso das cores e como mesturalas para sacar o máximo proveito sen ter que gastar unha morea de cartos. Tamén houbo quen repetiu coa idea de mellorar a súa técnica.

Como non podía ser doutro xeito, Rotting Pizza tamén estivo presente na primeira edición de Con-Dados de Marín, unha xornada de partidas de rol na que a Asociación participou con dúas partidas. Un día completo que esperemos que se repita o vindeiro ano con maior éxito se cabe 👑

Este ano estivemos de novo no Salón do Libro infantil e xuvenil de Pontevedra, da man do MUVI, mostrando a maxia dos xogos de mesa aos máis pequenos. É unha gozada ver a motivación e a ilusión nos máis pequenos, que rapidamente facíanse co truco dos xogos e xuntábanse en partidas de varios xogadores 👶

Rematamos con teatro e rol en vivo, de novo en Noites Abertas para mostrar a conexión entre estas dúas disciplinas que teñen tanto en común. Buscamos o xeito neste obradoiro de usar as técnicas teatrais clásicas para representar aos nosos personaxes en partidas de rol en vivo 🎭

Pero todas estas actividades teñen dous motivos claros para nós: por unha parte mostrar a toda a xente a nosa paixón polos xogos, as súas cualidades e grandezas e pola outra conseguir os fondos necesarios para levar a cabo a reforma definitiva do noso local en Poio... Pronto volveremos a abrir as portas do noso local nunha xornada de portas abertas na que esperamos que vos acerquedes e quen sabe, tal vez pasedes a formar parte desta Asociación 😊